Құрметті достар, әріптестер!

Баршаларыңызды бүгінгі Алғыс айту күнімен құттықтаймын!

Алғыс айту – адамдықтың белгісі деп білемін. Сондықтан ең алдымен өскелең ұрпаққа сапалы білім, саналы тәрбие беруде қалтқысыз қызмет етіп келе жатқан еліміздегі барша педагогтер қауымына және ардақты ардагерлерімізге шынайы ризашылығымды білдіріп, алғыс айтқым келеді.

Өскелең ұрпақ тәрбиесінде ата-аналардың алатын орны да ерекше екені белгілі. Сондықтан өз перзентінің өсіп-жетілуіне бей-жай қарамай, тағылымды тәрбие, үлгі-өнеге көрсетіп жүрген барша ата-аналарға да көп рахмет.

Үйдегі ата-анасынан алған тәлім-тәрбиесін ұстаздардың тағылымымен ұштастырып, дарыны мен қарым-қабілетін шыңдай білетін, оқуда озат, талабы зор жас өрендерге де ерекше ризашылығымды білдіремін.

Жалпы адамзаттық һәм ұлттық құндылықтарды әспеттеу арқылы еліміздің береке-бірлігін сақтап, өсіп-өркендеуіне үлес қоса берейік. Әр шаңыраққа шаттық, ырыс-береке тілеймін! Мереке құтты болсын!